الكاتب الصحفى محمد جمعة يدشن مبادرة لتدريب طلاب الجامعة مجانا.. ويدعو أصحاب الخبرات لمساعدة الطلبة
الكاتب الصحفى محمد جمعة يدشن مبادرة لتدريب طلاب الجامعة مجانا.. ويدعو أصحاب الخبرات لمساعدة الطلب
نشر الكاتب الصحفى محمد جمعة، مدير تحرير اليوم السابع، دعوة عبر حسابه على موقع التواصل الاجتماعى فيس بوك إلى كل من لديه خبرة في أي مجال إلى مساعدة مجموعة من الطلاب ممن يدرسون التخصص الذى يعمل به خلال فترة الإجازة الصيفية.
وناشد محمد جمعة أصحاب الخبرات والذين لديهم معرفة متراكمة في أي مجال أن يخصصوا ساعتين أسبوعيا للشرح من خبراتهم لطلاب التخصص الذى يبرعون فيه، حتى لو كان ذلك عبر وسيلة من وسائل الاتصال سواء بالفيديو أو الصوت.
ووجه مدير تحرير اليوم السابع نصيحة لكل طالب وطالبة في أي تخصص بألا يضيعوا السنين التى يتكفل فيها الأهالى بالإنفاق عليهم دون أن يدربوا أنفسهم، قائلا: “نصيحة منى لكل طالب وطالبة في أي تخصص كان متضيعش السنين اللى بيتصرف عليك فيها من أهلك من غير ما تدرب نفسك في مجالك علشان لما تتخرج متتعبش كتير علشان هتبدأ وقتها من الصفر لو مكنتش مؤهل للشغل والمعركة اللى هتواجهها.. روح أي مكان بيشتغل في مجال دراستك وقولهم أنا عاوز أتدرب مش عاوز فلوس.. أيا كان مجالك متضيعش الإجازة بتاعة الصيف من غير ما تتعلم فيها حاجة تميزك في مجالك.. والله هتندم بعد ما تتخرج لو مستغلتش فرصة الوقت اللى فاضى ده.. ده بالنسبة للطلبة”.
وتابع محمد جمعة عبر صفحته على فيس بوك: “أما بالنسبة للناس اللى ربنا كرمها بعلم في أي تخصص.. ماتبخلش بعلمك وخبرتك وساعد الناس إنهم يتعلموا من الخبرة دى.. ساعدهم لوجه الله مش لازم يكون ده على شكل كورس بفلوس وتقول ده ثمن خبرتى اللى هديها لهم.. خلى الثمن عند ربنا وهتلاقيه كبير”.
وأضاف: “كورونا نبهتنا كلنا لوسيلة مهمة جدا وسهلة إنك تعلم الناس من غير مجهود كبير.. ألا وهى تطبيقات التواصل بالفيديو أو بالصوت.. لو خصصت ساعتين أسبوعيا لجروب من الشباب اللى بيدرسوا تخصص أنت عندك خبرة فيه تشرح لهم لوجه الله هتحس ببركة كبيرة فى وقتك.. اعتبر دى مبادرة شارك فيها خبرتك مع ناس أكيد هيدعوا لك بقدر الاستفادة اللى هتقدمها لهم من غير ما تنتظر منهم هما الجزاء.. اللى عند ربنا أكتر وأكبر وأبقى”.
وتابع: “أنا عندى استعداد أكون أولكم وأعمل ده مع أى عدد من طلاب صحافة فى أي مكان وبلا مقابل.. وأى طالب إعلام شعبة صحافة من أى جامعة مرحب بيه.. أنت كمان حاول تعمل كدة وهتشوف بركة عمرك ما كنت تتخيلها أيا كانت خبرتك صغيرة أو كبيرة أكيد هتفيد غيرك”.
