كام حد قابلته و إكتشفت إنه بيمثل حب الخير و إن قلبه أبيض و طيب وأمير وما مبيكرهش حد ، و مع أول خلاف أو إختلاف … الغل بيظهر والوشوش تتبدل ، والسواد اللي جواه يطفح و يتفضح قلبه باللي شايله !!!!
مع مرور والوقت و الخبرة و التجارب ، إكتشفت أن القوة الحقيقة هي إنك متخليش حد يسوقك … متخليش حد يعاملك بمزاجه …. شوية يعاملك بشكل حلو كأنك أقرب الناس ليه، وشوية يبعد عنك كأنك عدو الغدر متأصل فيه ، ويفضل واخدك معاه رااايح جااااي ، على أساس إن وجودك مضمون في حياته ، وإنه مهما عمل هيلاقيك مستنيه في الآخر بردو.

أوعى_غلط

للأسف معظم الناس اللي بنشيلهم فوق ظهرنا وقت ضعفهم ،، بيبقوا هما نفسهم أول الناس اللي بتطعنا في ظهرنا وقت قوتهم ..
وبينسوا أد إيه كنا صادقين ومخلصين معاهم .. و قد إيه قلنا عادي و هو لا كان عادي و لا عمره كان عادي ، وقد إيه عدينا و سامحنا وغفرنا و إحتوينا .. أد إيه كنا قلوقين و مهتمين و حاجات كتير من كتر ما هفتكرها ، مش هقدر أحصرها…
كل اللي هنفتكره في الوقت ده اد إية نفسنا صعبت علينا وإننا مكناش نستاهل كده.
عمرك ما هتستوعب إنك فهمت إلا لما تاخد الدرس وتتعلم منه كويس ، و أنك لازم متديش كل الحلو اللي جواك مرة واحدة ، وانك لازم تفهم إن الثقه والأمان مينفعوش يكونوا لأي حد ، عشان متحسش ان اللي مشيتله طُرق مفكرش يمشيلك خطوة، وإن اللي كنت بتسمع له وتواسيه و تجبر بخاطره ، كان أول حد يجي عليك..
خلينا دايماً نتعامل بالعقل و الحكمة و نقيس المسافات صح بينا وبين الناس ، و نبطل نخلي حد يسوقنا ، و نبطل نخلي مشاعرنا تسوقنا عشان نقلل الصدمات في حياتنا، و ربنا يزرع في طريقنا الناس الطيبين .. اللي نحس معاهم اننا منهم و إنهم مننا ..و ينجينا من أصحاب الوشين المتلونين ، ويبعدهم عن حياتنا اللهم آمين…
‏‎فإنا لنا فِي الله دوماً ‏”ظَنٌّ لا يخيب”، و ندعوا الله أن يرزقنا بصيرةَ الطريق، و عونَ الرفيق، و زادَ الروح، و قوة الطمُوح..و أن يهَبنا أيّامًـا تحفها البهجـَـة ‏مِن ڪُل الجِهـآت ، و سعادة تملؤها حتى الممات ..

بقلم/ ياسمين دسوقي
مدير عام مساعد التدريب
شركة الخدمات البترولية للسلامة والبيئة “بتروسيف”
قطاع البترول و الثروة المعدنية
وعضو المجلس القومي للمرأة بالقاهرة